Lunpoezio- E-Poetoj

Kanto de l'ventoj -SIGURD AGRELL

2007-08-09T23:53:00.000Z

Kanto de l' ventoj

For super mar', moviganta la ondon,

Super la ter' en bruanta vojaĝ'!

Nin jam ekvokas eksteren en mondon

Reĝo matena kun roza vizaĝ'.

For al bluanta,
Onda la mar'!
For al bruanta,

Verda l' arbar'!

Homoj kaj bestoj en tera la ĉelo

Aŭdas kun tim' je ventega la kri'.

Ni en liber' ĝis l' arkaĵ' de l' ĉielo

Flugas kaj venas sciige de ĝi.

SIGURD AGRELL

pliajn poemojn sur la retejo http://www.algonet.se/~inko/agrell/

poemeto

2007-07-15T00:14:00.000Z

Silento...
marsxanta laux la lekema sxaumo
marbordo, profilo,
linio kaj limo...
Tero -oceano , songxo -realo
mi revas, memoras pasinton- estontecon
nun...kie mi estas kaj kie mi iras?

maria c. de armas

Waldemar Lipowicz

2007-06-14T08:12:00.000Z

Mia kara amiko Waldemar Lipowicz fine realigis sian revon eldoni libron kun poemoj..tiom da jaroj kaj jen sia frukto...El Songxoj Haltitaj...mi esperas legi gxin baldaux kaj gxui la grandan sentemon de cxitiu especiala Homo...Princo...Mi brakumas vin forte...

NEWELL- Rugxa Tramo

2007-04-23T17:46:00.000Z

La ruĝa tramo aŭ: Printempo en Londono
de L. N. NEWELL -en Dekdu poetoj, p. 76

Ho svingiĝanta tram', ruĝega krio
Ardanta sur printempa mola sino
De l' ŝaŭmaj arboj; ŝtala geranio

Rimanta kun la lip' de stratanino
(Papavo de l' pavimo), vi ŝoviras
Tra bluaj retoj de la gazolino

Kantante ĉefarion, kiu ŝiras
L' obtuzan tondron rondan de l' sonato
Trafika; onda kontrapunkt' deliras

Kaj ŝprucas sur krutaĵon de l' murplato
-- Bruoceano sur la granda vojo,
Flueta flustro en la fora strato.

Hundinon ĉasas hund' kun ama bojo;
En ombra parko, pro ŝaŭmanta juno,
Virinon ĉasas vir' kun hunda ĝojo.

Duŝilingo pale pendas, kvazaŭ luno,
Solece super urb' ardanta forne;
Ĉielo ŝminkas sin per morta suno.

Al tramo, kiu palpebrumas dorme,
Najado kuras tra lampluma strio;
Taksioj malproksime krias morne.

Poemo printempa pri koro-doloro de Tom KRISTENSEN

2007-03-21T16:33:00.000Z

Poemo printempa pri koro-doloro de Tom KRISTENSEN
eldanigis Poul THORSEN

Kun la printempo ĉi-nokte forkuris
laca, cikatra de mi mia koro.
Troe mi uzis ĝin mismaniere
por la amoro, sovaĝo, doloro,
Vidu la lertan rimiĝon per koro-doloro!
Ĉe la vekiĝo en brusto juketis
rava malpleno, senkora ŝveliĝo.
Kuŝis mi kun aranea ridemo
sur la vizaĝ' en printempa heliĝo.
Vidu la lertan rimiĝon: ŝveliĝo-heliĝo!
Se ĉi-matenon printempan alvenos
al mia lito orhara in-ulo,
prenos mi ŝin en senkora feliĉo,
ĝenos neniam memora makulo.
Vidu la lertan rimiĝon: in-ulo-makulo!
Senemocie mi ridos kaj amos,
flustros, karesos, brakumos, kisigos,
sen emoci' kiel rimoj banalaj,
kiujn mi verse drivigas, disigos.
Vidu la lertan rimiĝon: kisigos-disigos!
Tamen mi scias: Revenos en majo
olda, cikatra al mi mia koro,
alta kaj kiel arbŝelo ŝirita,
fia diable pro am' kaj doloro.
Vidu la lertan rimiĝon per koro-doloro
-- denove!

simplaj vortoj

2007-03-20T14:31:00.000Z

vi estas

mia plagxo solecas
nur oceanon mi povas rigardi
dum horoj, tagoj, monatoj...bluo
blua horizonto, blua cxielo...bluas cxie.

cxio igxas tro same
kaj mia koro sekigxas
la vivo peze falas sur la sxultroj
sed mi tamen kapablas ankoraux senti...

mi trovis vin, stelo,
brila, vivanta inter multaj aliaj miloj da steloj,
mi sxatas rigardi kiel vi brilas,
ludi kun la revo ke mi povas tusxi vin,
kaj imagi ke iam mi povas esti pli proksima.

Mi kisos vin...
cxinokte noktas profunde
cxar vi ne cxeestas-

Mi kisos vin dolcxe,
per mielaj pauzoj la lipoj povas atingi la bildon
de via rideto ankoraux.

La lamo kaj la laro

2007-02-22T23:55:00.000Z

Iun tagon, cirko staris
en vilaĝo ĉe la maro.

Oldan lamon suferigis

terurega dentdoloro.

Ĝi manĝis malmolan grenon

kaj frakasis la molaron.

Super la cirko, flugetis

iu granda blanka laro.

Tristan ĝemon ĝi aŭdis

elvenantan de la cirko.

Ĝi proponis al la lamo

helpeton por resanigo.

Enfosante sian bekon

enen de l' buŝ' malfermita

de la lamo mirigita,

ĝi eltraktis la molaron.

Poste la lamo feliĉa

fariĝis tute dankema.

La moralo: Lamo, laro... La molaro...

Ĵeo - JOEL

Norman Darlington- Hajko

2007-02-08T16:47:00.000Z

tago de Brigid —

la bruo de siteloj

cxe sankta puto

Unua februaro estas la Tago de Brigid (gaele: Lá na Brídeoige). Gxirigardigxas kiel komenco de printempo, precipe en la kamparo.Tradicie, oni levas akvon el sankta Brigid-puto (ekzistas multaj), kajjxetas gxin sur agrojn kaj bestojn, por pliigi ilian fekundecon.
Amike Norman

partopreno

2007-02-08T12:08:00.000Z

se iu emas partopreni en la blogo de la forumo bonvolu, sendi poemon aux kritikan komenton pri io rilate al literaturo al mia persona retadreso.
amike
Luno

Forgesi vin

2007-01-08T17:47:00.000Z

Mi sentis ke cxio falis fulme...
la muroj cxirkaux mi, la fenestroj...la konscio.
La domo ne plu estis domo,
la steloj peze rompis mian pecon da mondo,
kaj mia oceana forto malapeis lante batanta
la nigran teron sekan de mia cxiutago.

Mi kredis ke la lumo malaperis kaj cxio igxis eternan nokton;
ne eblis plu spiri la dolcxan aeron de la tagoj
nek la dolcxan guston de via hauxto...

Kiam vi foriris, la morto de la sencoj frapis mian pordon.
Nun, manoj karesemas mian malgajan vizagxon,
novaj okuloj rigardas min pasxi en la sablo solece kaj vokas, petas min: estu mia insulo.

Se mi povus... se mi povus...forgesi la ombron lian...

Maria C. de Armas- luno

Bondezirojn

2006-12-22T13:40:00.000Z

Felicxan Kristnaskon

Ulekso - Norman Darlington

2006-12-01T00:07:00.000Z

Hodiaux mi plantis terpomojn. Ilia odoro tereca restemas sur la manoj.
Bezonante fari pison, mi marsxis al la kamplimo. Starante, eniris mian nazonla sukera kokos-sxalmtabakeca odoro de la ulekso. Delicmomento!
cxirkaux la pordet'
ulekshegx' nekombita
florantas ore.

Norman Darlington

Traduko Kotava

2006-11-20T16:01:00.000Z

Mi ne mortas de María C. de Armas

Tradukis al Kotava Philippe.
(esperanta versio sube)

Me awalké

kore va jin vulkuyul, golde soluma

moo piluda tí, kabdue bira.

Ware tison gadiafa is jotafa alma

ware nuba do ar renasik vefar

ware jinafa klokara kaltalar

ise ware usukeem tir jinaf darknilt

Odi et Amo de CAIUS Valerius Catullus

2006-11-19T23:22:00.000Z

ellatinigis K. KALOCSAY

Mi malamas kaj mi amas.

Kial? Vi demandas min.

Mi ne scias, mi nur sentas

kaj turmento fandas min.

El la retejo de Don Harlow donh.best.vwh.net/Esperanto/Literaturo/Revuoj

Unue aperis en la nica literatura revuo 7/3 (n-ro 39) p. 82

Poemo Antverpeno-Lode Van De Velde

2006-11-08T14:41:00.000Z

Antverpeno

trankvile songhas la vilagho,
luno lumigas la kampojn,
bovino estas stable
enlite oni amoras au dormas.

laute ronkas la urbego
lanternoj lumigas la stratojn
ebriuloj balbutas bufede
enlite oni amoras kaj pagas.

nokte mi promenas tra la urbo,
ghuas la konatan atmosferon
stelojn mi chi tie ja ne vidas,
sed la Skeldaj lumoj kompensas.

Lode Van de Velde

poema

2006-11-04T22:22:00.000Z

Mi ne mortas,

ecx se vi forgesis min, pro distanco,

mi cxeestas en la plagxo, fronte al la maro.

Ankoraux la hauxto pretas kaj junas

ankoraux la manoj ludas kun aliaj amantoj

ankoraux miaj revoj flugas tien reen

kaj ankoraux mia hararo estas flago de mia spaco.

maria- luno

Biografio Eli Urbanova

2006-10-18T17:38:00.000Z

Biografio: Poetino URBANOVÁ, Eli (Eliška) Cxehxio 1922.
Unu el la plej gravaj poetoj en Esperanto, lernis la lingvon en 1948 kaj komencis verki esperante en 1950.
Sxi estis membro de la Akademio de Esperanto Unu el la fondintoj de Esperantlingva Verkista Asocio en 1956. Akademiano 1986-95. Inter la plej famaj verkoj trovigxas : Nur tri koloroj (1960)Hetajro dancas (aŭtobiografio 1995)...
Plia infomo cxe Vikipedio http://eo.wikipedia.org/wiki/Eli_Urbanov%C3%A1

Ami

de Eli URBANOVÁ

el la libro Nur Tri Koloroj - Ed. Stafeto- La Laguna (Tenerifo)
afiŝita al la listo/forumo lunpoezio 2004.10.06;

Travivi amon freneze skuan,

danĝeran, krudan kaj detruan,

kiu ne timus eĉ mortigi!

Ekvivi forte! Ho, ami ree!

Perdiĝi tute, memperee

en sankta fajro de pasio!

Kiam amo estingigxas- korektita

2006-10-09T22:05:00.000Z

Mi pensas vin, nun,
nun mi pensas vin.
Mi repasxas la vojxojn
mi reflaras la aromojn
mi klopodas preni vian ombron
en nia kutima kafejo,

en nia lito,
la manoj tiam kunludemaj.

Mi pensas vin,
nun kaj post, pensi vin mi ne cxesas.
Sercxas en la urbo haron vian,

la sonon de via rido
meze de la popola amaso senkolora.
Kiel vi estingigxis? senripoze.

Via flamo dolcxa
karesema, longa...
kiel vi mortigis mian duonon?
Kiu mi estu nun? tiom sxirita.

Mi nudas, mi sidas, mi spektas sekundojn fali,
la dura trotuaro, la telefono tro muta.
La vivo ne plu batas ie,
vi scias...mi amas...cxu plia doloro?

Maria C. de Armas

Tra Monde - Maria C. de Armas ( luno)

2006-10-05T00:35:00.000Z

Antaux naskigxi spiris mi vian ventron
mola, malluma kaj trankvila.

Regionoj enaj kaj eksteraj
plenplenaj de dezirata vakuo kaj silento,
Tiom for de la kutima vivo.

Mia vango, sur via ventro sonora restu
por eliri dum momento de mia brua vivo.

Maria C. de Armas

Omagxe a Wouter Pilger

2006-09-11T00:22:00.000Z

Omagxe al amiko, persono, esperantisto kaj brila poeto WOUTER PILGER.

UNUECO- Andreas Kück

2006-08-06T19:14:00.000Z

“Unueca estu Esperanto”,
pensas nia nova komencanto.

“Sed kial do ja trovas mi
kvar formojn de la vorto shi?”

Nur au kun h au kun chapelo,
lau Fundament', estu la celo.

Estas tamen shi kun ikso au apostrofo
por lingvo internacia ja katastrofo.

Esperanton forstrekas el listo
konfuzita ne-esperantisto:

“Unue interkonsentighu vi,
kiel vi skribas tiun vorton shi.

Kaj nur poste ja postulu vi
ke akceptu Esperanton mi.”

Andreas Kück

Wouter Pilger- Mia Cxio

2006-06-09T13:51:00.000Z

MIA CHIO
Wouter Pilger

Kara,
vi jam vidis chiujn stelojn
antau ol ech unu sputniko
enspacighis.
vi stelpintepikis mian noktan bruston.
la kosmo
estas kava.

Chi-nokte en songho
mi postkuris vin
sur la shtonaj strandoj
de la sudo.
vi estis havinda
kiel juna delfeno.
sur la shtonaj strandoj
mi postkuris vin
dum vi kushis apude.
plej apude, mia havinda.

Ne chiuj estas kia mi.
imagu!
la vojoj de liliputo
en brodbingnag
devas esti strangaj.
la birdo, kiu ekstere
kantas la sunon
ne kantas por mi
lau sama tono.

Kara,
mi scius tre bone
kion fari

se mi ne havus vin,
mia chio.
__________________________________________________

Noteto nokta

2006-05-25T23:38:00.000Z

Bildo: Isadora Duncan Sen Arto = sen muziko sen pentrarto sen danco sen poezio sen vocxo sen emocio sen verkoj kiel ni ekzistus

http://brainew.com/audio/BethoveenSonata.mp3

Jurovijxen

2006-05-20T20:33:00.000Z

Kio estas tiu kricxo
kiu sxprucas
el najbara bildskatolo?

Ha jes, jes ja, mi forgesis,
tio estas
la artama gxoja festo...

Jurovijxen :)

-Leo

Renkontigho

2006-05-20T16:43:00.000Z

ESPERANTISTA KREA RENKONTIGHO ABRITUS-2006
(sub la auspicio de la revuo "Literatura Foiro") en Razgrado - Bulgario

10 junio 2006 (sabaton)

14h30: Vizito de la Etnografia muzeo.
-16h00: Oficiala malfermo de la nova propra sidejo de la Esperantista Domo de Kulturo "D-ro Ivan Kirchev".
-18h00: Anonco de la rezultoj de la Internacia Literatura Konkurso kun programo de la artkolektivoj funkciantaj che la Domo. Disdono de diplomoj al la finintaj E-kursojn.
-20h00: Oficiala vespermangho.

11 junio 2006 (dimanchon)

-9h30: Che taso da teo - debato "Perspektivoj por agado de la lokaj E-grupoj en la regiono".

Organizas: Esperantista Domo de Kulturo "D-ro Ivan Kirchev" str. "Sv. Kliment" 36 BG-7200 Razgrad (Bulgario) telefono +359 84 28352 retadreso: esperanto_razgrad@mail.bg

-novajxo aperinta cxe Heroldo.

Gafur Gazizi

2006-05-09T08:25:00.000Z

RUSTIKA EROTIKO
de Gafur Gazizi

Juna blanka nuda korpo

elakviĝas el river'.

Ŝin prilumas luna korno,

banas bluo de vesper'.

Kaj saliko amindume

emas ĉirkaŭpreni ŝin.

Kverko kun suspir' maljune

staras, gapas en proksim'.

Junulino post naĝado

frotas korpon per viŝtuk'.

Steloj tremas pro kor-bato,

ilin tentas pufa pug'.

Sed ŝi vestas sin rapide,

alvilaĝas preter kamp'.

Akompanas ŝin ekscite

najtingala amokant'.

Proksimaj Eventoj pri Poezio

2006-04-30T00:56:00.000Z

8 - 9. junio 2006
Kunveno de poemoj kaj muziko en Yatugatake Esperanto-Domo, Japanio. Inf: Japana Esperanto-Instituto (JEI), JP-164-0042 Tokyo-to, Sinzyuku-ku, Waseda-mati 12-3. Tel +81-3-3203-4581, Fakso: +81-3-3203-4582. Rete: esperanto@jei.or.jp

15 a 22a Julio 2006
Gresillon kulturdomo de Esperanto gresillon.org
Gerrit Berveling (Nederlando) seminario pri historio de poezio en Eŭropo ĝenerale, kaj pri originala Esperanto-poezio

Poezio laux vortaro

2006-04-30T00:52:00.000Z

poezio

1.
Arto esprimiĝi, ofte per versoj, en kiu la bildoj, la elektitaj sonoj kaj la ritmo servas por veki emociojn ĉe la leganto aŭ la aŭskultanto: sin dediĉi al la poezio; la poezio estas la muziko de l' animo.
2.
(figure) Forto kapabla veki delikatajn emociojn: ŝiaj leteroj estas plenaj je poezio; [tiu bildo] enhavas en si tutan trezoron da poezio [1]; artista dilanteco ... spicas [la staton de riĉeco] per certa dozo da ĉarmo, poezio, festeco de impresoj kaj okupoj [2]; poeziemo [emo al delikataj emocioj] ekkaptis min.

http://www.uni-leipzig.de/esperanto/voko/revo/art/poezi.html

Jorge das Neves * Georgo das Neves

2006-04-27T09:29:00.000Z

Al cxiuj, kiuj ama:
"Soneto de uma saudade noturna"

SONETO DE NOKTA SOPIRO

Rompita kor' pro tiom da pasio,
tiom da amo en la sama kor',
kor' amema, rompita, dimensio
de revema kor', de la kor' je flor' ...

Neniam plu la renkontigxo... Io
okazis sur la Tero, ne amor' !
Okazis amo! Amo, plu nenio,
rigardo sen la kiso, sen sapor'...

Saporo de sopiro, nur deliro
en mia koro trista kaj rompita;
sopiro sen saporo, nur sopiro!

Kial ne venas vi en la zefiro,
denove kaj denove, koro mita?
Ve! sopiro!... Saporo de deziro...

Jorge das Neves * Georgo das Neves
LL Je nokto de la 26-a de Aprilo 2006
Pentuvio amas pentuviinon...

Triopa Memo - Marjorie Boulton

2006-04-21T10:34:00.000Z

Triopa Memo

Marjorie Boulton

Mi estas tri. La digna lektorino

kun krajon' kritika libron legas.

En nigra robo, pri la origino

de l' dramo primitiva ŝi prelegas.

......

Dume, en koro, primitiva dramo

okazas, ĉiam freŝa kaj terura;

sub nigra robo brulas nun pro amo

virino simpla en dezir' tortura.

.....

La lektorino pensas.

La virino baraktas, krias, nur angoron sentas.

Sed la Poet', per arta disciplino,

observas ilin ambaŭ, kaj komentas

FAZOJ: Hajko-Ciklo

2006-03-24T22:12:00.000Z

moskita zumo

malantaux sxia kapo

estas novluno

luno tritaga

elbrilas alte por ni

silento laga

kasxigxas domo

de falantaj negxeroj

lunoduono

sub la lungxibo

li laboras ankoraux

unua skribo

virino juna

kusxas sur lia lito

plenlumo bruma

Donald Jacob UITVLUGT

La poemo partoprenis en la konkurso de la forumo 2005.

2006-03-24T22:06:00.000Z

Kasxe

Kiel bele kasxi nian amoron
Meze de la maro profunda.

Kiom da viglaj ondoj :
Iroj kaj revenoj
inter la likva medio kaj la nudaj korpoj

La lipoj gustumas salitan sxultrojn
La haro igxas algoj
La manoj, la kruroj, la mamoj,
La ventro… igxas la mondo.

Maria C. de Armas

vortoj por vi

2006-03-12T12:58:00.001Z

Brila rideto en viaj okuloj,
vi revenis, ni retrovigxis.
La mondo igxis pli paca,
mia eno trankviligxis.

Trovis mi viajn brakojn
cxirkaux la talio,
ili donis sencon kaj forton
al mia soleca spaco.

Maria C. de Armas- Luno
Poemo verkita:
12 marto 2006 -13:00 GMT

Komenci

2006-03-12T10:51:00.000Z

FOTO: Kuoplo de Amo Rafael Minkkinen

La ideo krei cxi-tiun blogon de poezio ne estas nova...ja ekzistis/as pluraj sed individualaj. Hodiaux mi vizitis la blogon de Lisxano, prunodorna. kaj trovigxis ligo al magnapoets: Kolektiva blogo de poezio.
Do, jen ideo por Esperanto : Lunpoezia kolektiva blogo.
Belan Dimancxon.

*Maria C. de Armas - LUNO